Moldviken Kaffibrenneri

Moldviken Kaffibrenneri er eit hobbybrenneri drive av Arild Gismervik og Vidar Sakariassen, to nysgjerrige naboar frå Vorrå vest som brenn for kaffi – og som brenn kaffi. Brenneriet har to moderne småskalaeiningar for kaffibrenning, men dei er heller ikkje framande for eldre og meir primitive brenneteknikkar. Brenning treng ikkje vere komplisert! Nøye vel dei ut ubrende bønner, fyrer varsamt opp brennarane og brenn kaffien med glede. Ja, i over eit tiår har dei – i alle fall den eine av dei – halde på slik, i skjul for verda, midt mellom hav og mark, kyr, lyng og sau, og glødd fram smakar og sin eigen kaffikultur.

No kjem Moldviken Kaffibrenneri til Vorrå huskonsertfestival. På utstillinga «Pusterom» presenterer og serverer dei nybrend kaffi, heilt gratis. Er me heldige, har dei kanskje òg med seg litt utstyr til demonstrasjon og noko å bite i til kaffien. Kven veit? Eg seier ikkje meir!